Baatein - Gravity

Hey Rehana, kaisi hai tu? Mai yaha thik hu

Bache kaise padh rahe hai?

Kya sach mai thik tu?

«Yaha sab thik hai par log kaafi neech hai

Mushkil hai rehna aise logon ke beech.»

Woh jagah badnaam hai, main itna garib kyu?

Unn logon pe hai mujhko bharosa hi nahi, sunn

Mujhe agle mahine mil raha hai bonus

Diamond ka hai contract, hai yeh nahi bogus

Paise ayenge woh naye ghar ke liye hoge kaafi

Sabra rakhna aage hai yeh bas do mahine baaki

«Kaafi achi baat hai yeh mai bohot khush hu.»

Kuch nahi chahiye mujhe agar hai khush tu

Itne saalon se hai tune rakha hamesha saath

Kitne toofano se hai bach nikle thaame haath

«Karti pyaar itna tumse isliye toh saath hu

Rahenge hamesha saath, jaise bhi haalat ho.»

Kharidenge ek ghar jo ho aalishan

Mehel sa woh ho, uss mehel ki Rani aap

Aas paas bageeche, nazdeek hi taalab

Aur jo nazaara hoga uska na hoga jawaab

Har hafte hum ghoomenge aur picnic pe jayenge

Ek dooje ke saath hoge hum jaise ho saaye se

«Intezaar mujhko kaafi, sach hogi yeh baat

Par maaf karna hai waqt kam hamare paas, Raj.»

«Aapka samay khatam ho chuka hai.»

Hai yeh baatein ankahi, hai yeh baatein sab fisool

Hai yeh baatein sab ajeeb, hai yeh baatein sach se door

Raj Singh, umra 25, shadishudha naujawan

Karta pyaar Rehana Shah se, woh bhi usse karti pyaar

Dono samaaj ko chhodke rehna chahte the ek saath

Raj ki thhi ek biwi aur judwa bacho ka parivar

Aur Rehana ke liye Raj hi tha uska sansaar

Anjaam, woh uske bache ki banne wale thi maa

Khabar yeh pad gayi samaaj ke logon ke kaano mai

Aur maar diya Rehana ko unhi haivano ne

Samaaj ki izzat kisi jaan se bhi badhkar hai?

Inn logon ke paas toh dil nahi kankad hai

Raj ab tha pagal khaane mai

Uski biwi Rehana bankar usse karti baatein hai

Uski aatma ko mile shanti meri hai dua

Samaj ke inn jhoothe rakshako ko meri baddua

Par hum bhi iss samaj mai, toh kya mai zimmedaar hu?

Ajeeb yeh sawaal hai, na jaanu kya jawaab du

Na jaanu kya jawaab du, na jaanu kya jawaab du